Shi, diell apo dëborë? Nesër festa e Krishtlindjeve, zbuloni si do të jetë moti

Nesër është dita e Krishtlindjeve, por mesa duket moti nuk është shumë në favorin tonë.

Në zonat malore priten reshje dëborë, ndërsa në pjesën tjetër të vendit me vranësira dhe reshje të dobëta shiu.

Sipas MeteoAlb, pasditja e sotme shton vranësirat në skajin verior duke rrezikuar reshje të pakta dëbore, ndërsa pjesa tjetër e vendit mbetet me kthjellime.

Ndërkohë ditën e nesërme (25 dhjetor) vendi ynë do të përfshihet nga vranësirat në pjesën e parë të ditës duke bërë që zonat Qendrore dhe Jugore të kenë shira të izoluar. Por orët vijuese do të përmirësojnë kushtet e motit në territor, duke bërë që moti i kthjellët të mbizotërojë.

Temperaturat e ajrit do të vijojnë të ulen në mëngjes dhe në mesditë duke u luhatur -4°C deri ne 13°C.

Era do fryjë mesatare në tokë dhe e fortë në det me shpejtësi 60 km/h nga drejtimi Veriore duke krijuar në det dallgëzim 5 ballë.