Plas debati/ PS nuk i ndahet Metës, shtyhen punimet e Komisionit, kundërshton opozita e re: S’bëhet puna kështu, shto ujë e shto miell

Ditën e sotme është mbledhur sërish Komisioni Hetimor Parlamentar për shkarkimin e presidentit Ilir Meta.

Gjatë mbledhjes që është drejtuar nga Ulsi Manja, është vendosur që punimet të zgjaten me 4 muaj, duke dërguar kështu disa pyetje te Komisioni i Venecias, i cili është organi që do të japë opinionin e saj përsa i përket veprimeve të Metës në lidhje me emërimin e anëtarëve të Gjykatës Kushtetuese.

Gjithashtu mazhoranca ka dërguar në Venecia edhe përplasjen për dekretimin e Marsida Xhaferllarit në vend të Arta Vorpsit, gjë që solli edhe kallëzimin penal të Metës për kreun e KED Ardian Dvorani.

Opozita e re dhe deputeti Alban Zeneli kanë dalë kundër sepse ata kanë pretenduar se gjëja e parë që duhet të shqyrtohet fillimisht është shkelja e parë që ka bërë presidenti Ilir Meta duke anuluar zgjedhjet e 30 qershorit.

DEBATI NE KOMISIONIN HETIMOR

Alban Zeneli: Të mbarojmë fillimisht për atë çfarë u mblodhëm. Më pas përfundojmë, dhe vijojmë me shtesat.

Halit Valteri: Nuk mund të merremi se çfarë bën sot Meta apo çfarë do bëjë Meta. Nuk bëhet kjo punë shto ujë e shto miell. Jemi kundra shtimit të objekteve të hetimit për Presidentit në këtë Komision.

Spartak Braho: Unë jam dakord me shtesën e subjektit të hetimit. Komisioni është nisur për të shkarkuar Presidentin. Ai shkarkohet për shkelje të rënda. Tek objekti i hetimit janë shtuar edhe 8 shkelje t tjera. nuk i gjykoj dot nëse janë të rënda apo të lehta. Nëse ka shkelur rëndë është për tu shkarkuar. Duhet të vazhdohet me këto shtesa.

Klotida Bushka: Duhet të thirret në seancë dëgjimore kreu i KED, Ardian Dvorani.