Pas tërmetit të 26 nëntorit me magnitudë 6.4 ballë që goditi Shqipërinë, shumë ekspertë të huaj në fushën e sizmiologjisë kanë mbërritur në vendin tonë.
Në kohën që lëkundjet vijojnë edhe pse në magnitudë më të vogël, profesori i gjeologjisë në Universitetin L’Aquila, Antonio Moretti ka parë situatën nga afër dhe dëmet e shkaktuara nga ky tërmet.
Sipas ekspertit italian, e gjitha kjo e ka një shpjegim.
“Jemi mbi një vijë, midis Afrikës dhe Europës, që po afrohen. Kalabria është e mbështetur në detin e lashtë të quajtur Thetis, që po fundoset duke lëshuar energjinë e tij. Deti Jon, Kalabria por dhe Apeninet italiane po afrohen drejt Adriatikut për shkak të shtyrjes nga Afrika. Është e njëjta gjë që i ndodh Lindjes, kështu që deti ulet në mënyrë të theksuar, lëshon energji në mantel duke ngrohur shkëmbinjtë që ngrihen në formën e magmës. Kjo është një zonë që merr presione nga shumë anë, jo vetëm nga Deti i Zi”, sqaron ai.
Gjithashtu Moretti shton se Italia dhe Shqipëria, megjithëse zona sizmike tepër aktive, nuk janë më të rrezikuarat.
“Nga ky këndvështrim, Turqia, harku helen dhe zona që kufizon Detin e Vdekur janë më kritiket, sepse ato janë në vijën e pllakave që ndan dy kontinentet, përkatësisht bllokun aziatiko-evropian nga njëra anë dhe gadishullin Arabik së bashku me Afrikën në anën tjetër. Duhet të mësohemi të jetojmë me tërmetet, duke u siguruar që të mos na i rrëzojnë më shtëpitë”, thekson ai në fund të shpjegimit.
