Përplasje me armë zjarri në kufirin greko-shqiptar, plagoset një polic

Një shkëmbim zjarri ka ndodhur sot në orët e para të mëngjesit në kufirin greko-shqiptar mes një grupi grabitësish dhe policisë greke.

Ngjarja ka ndodhur në Agio Nikola, Filat të Igumenicës, ku policia greke ka vënë re një grup prej 5 personash që po tentonin të kalonin ilegalisht kufirin nga Greqia në Shqipëri.

Skuadra e OPKE, sektori kundër narkotikëve dhe dy skuadra të policisë kufitare janë vënë në ndjekje të tyre.

Mësohet se 5 personat shoqëronin 2 kafshë mushka.

Gjatë tentativës për ti ndjekur, skuadra prej 5 personash hapi zjarr ndaj policisë dhe të njëjtën gjë ka bërë dhe policia greke. 3 persona kanë arritur të kalonin në tokën shqiptare, në një zone pyjore, ndërkohë që u kapën dy prej tyre, shqiptarë të moshave 16 dhe 46 vjeç.

Gjate kapjes, 46-vjeçari ka bërë rezistencë të madhe, duke plagosur lehtë një oficer policie.

Dy mushkat rezultuan të ngarkuara me 4 bagëti të therura, të vjedhura në një stan ne Agio Nikola, Filat.