Nën hetim prej kohësh, gjendet i pajetë në banesë ish-prokurori Agron Matjani

Ish-prokurori Agron Matjani është gjetur i pajetë në banesën e tij në Prizren.

Kjo ngjarje është cilësuar nga autoritetet si një vdekje e dyshimtë.

Zëdhënësi i policisë së Prizrenit, Shaban Osmanollaj ka konfirmuar lajmin për Gazetën Express.

“Ne e kemi një rast të vdekjes së dyshimtë që jemi duke e trajtuar në Prizren. Rasti është raportuar nga familjarët e tij. Vdekjen e ka konstatuar mjeku kujdestar që ka dalë në vendin e ngjarjes, pastaj janë dal hetimet rajonale, forenzika dhe Prokurori. Me urdhër të Prokurorit, trupi i pajetë dërgohet në Institutin e Mjekësisë Ligjore për obduksion”, ka thënë Osmanollaj.

Mësohet se prej kohësh Matjani ishte nën hetim pasi akuzohej se në disa cështje penale që ka punuar më herët, kishte zbutur dënimin në kundërshtim të hapur me ligjin.

Ai kishte kërkuar për personat e pandehur dënime më të lehta nga se parashikonte ligji dhe Kushtetuta e Kosovës, fakt ky i konfirmuar dhe nga Prokuroria.