Në kërkim për plagosje, arrestohet në kufi 53-vjeçari me pasaportë të vjedhur (EMRI)

Policia Kufitare e Qafëthanës ka arrestuar një 53-vjecar, pasi ishte në kërkim për vrasje të mbetur në tentative.

Mësohet se ai është Gjon Çaushi po tentonte të kalonte kufirin në mënyrë të paligjshme, ndërsa dhe mjetin e identifikimit nuk e kishte të tijin. 53 vjeçari ia kishte vjedhur pasaportën një personi tjetër dhe me të do të dilte jashtë territorit të vendit tonë.

Sipas informacioneve në 3 dhjetor të 2019, Gjon Çaushi 53 vjeç ka goditur me thikë shtetasin me inicialet E.Sh në Vlorë dhe është larguar nga vendi i ngjarjes.

NJOFTIMI ZYRTAR I POLICISE

Kapet një shtetas i shpallur në kërkim për veprën penale “Vrasja me dashje mbetur në tentativë”, i cili u kap duke kaluar kufirin në mënyrë të paligjshme, me pasaportën që i kishte vjedhur një shtetasi tjetër.

Shërbimet e patrullës së kufirit të gjelbër, në Stacionin e Policisë Kufitare Qafë-Thanë, bënë kapjen dhe ndalimin e shtetasit në kërkim:

Gj.Ç., 53 vjeç, banues në Vlorë.

Ky shtetas ishte shpallur në kërkim në lidhje me ngjarjen e ndodhur në datë 03.12.2019, në lagjen “Isa Boletini”, në Vlorë, ku dyshohet se ka goditur me mjete prerëse shtetasin E.Sh.

Punonjësit e policisë kufitare gjatë patrullimit të kufirit të gjelbër, kanë kapur shtetasin Gj.Ç., gjatë kontrollit fizik të të cilit iu gjet një pasaportë me gjeneralitetet e shtetasit A.A, 55 vjeç, banues në Vlorë, të cilën ia kishte vjedhur disa ditë më parë këtij të fundit, me qëllim kalimin e kufirit në mënyrë të paligjshme.

Veprimet e mëtejshme proceduriale u kryhen nga Drejtoria Vendore e Policisë Vlorë.