Ndërgjegjësohen qytetarët/ Pas konsultimeve me inxhinierët, fillon heqja e depozitave në mënyrë vullnetare

Pas shqetësimeve të ngritura dhe konsultimet e bëra me inxhinierët dhe ekspertët, banorët e Tiranës kanë nisur të heqin depozitat e ujit në mënyrë vullnetare.

Ata janë ndërgjegjësuar nga rreziku që sjell pesha e këtyre depozitave të mbushura me ujë, sidomos pas tërmetit të fuqishëm 6.4 ballë që goditi Shqipërinë mëngjesin e 26 nëntorit.

Kjo bëri që ata të reflektonin për peshën që ndodhej mbi tarracë dhe që i kërcënonte dita-ditës në rast të ndonjë lëkundjeje të mundshme sizmike.

Sipas inxhinierëve, heqja e depozitave bën të mundur që objekti të jetë më i shëndetshëm nga ana konstruktive.

Ky proces duhet të shoqërohet dhe me një projekt të Bashkisë së Tiranës për sistemimin e tyre në vende të rregulluara, në mënyrë që mos krijohen më probleme estetike si edhe në furnizimin e rregullt me ujë.