Kryeministri Edi Rama ka lëshuar një paralajmërim tjetër të fortë për mediat që të filtrojnë dhe të verifikojnë të gjitha informacionet që publikojnë.

Me anë të një postimi në rrjetet sociale, Rama thekson se do të merren masa kundër lajmeve të rreme në media në raste fatkeqësie, duke sjellë si shëmbull edhe Japoninë.

“Mos na detyroni të bëjmë atë që s’ua rrok imagjinata” thuhet në mesazhin e fortë të kreut të qeverisë.

POSTIMET E KRYEMINISTRIT EDI RAMA

Filtroni informacionet dhe verifikoni ato që thoni! Menaxhoni debatet dhe ndaloni klithmat nëpër studiot tv dhe përfshihuni në qetësimin e shpirtrave të goditur më keq se banesat! Kontribuoni për të kanalizuar energjinë e jashtëzakonshme të solidaritetit mbarëshqiptar!

Gjatë periudhës së gjendjes së jashtzakonshme të fatkeqësisë natyrore, Japonia ka masa ekstreme për mediat private, që mesa duket edhe në Japoninë e urtësisë së vjetër, paskan qenë taksirat mbi taksiratin e madh të tërmetit! Mos na detyroni të bëjmë atë që s’ua rrok imagjinata!