Presidenti i Francës, Emmanuel Macron duket se nuk ka ndër mend të heqë dorë nga mendimi kundër hapjes së negociatave me Shqipërinë dhe vendeve të tjera kandidate.
Ai u shpreh se para se të reformohet procesi i negociatave në tërësi, asnjë nuk do të pranohet.Sipas tij, aktualisht ky proces është burokratik, konfuz dhe i paqartë.
“Pyesni serbët nëse jeta e tyre është përmirësuar që prej hapjes së kapitujve të rinj të negociatave. Do të thosha jo. Franca nuk ishte vendi i vetëm i BE-së që kundërshtoi hapjen e negociatave me Shkupin dhe Tiranën. Para hapjes së negociatave, duhet reformuar fillimisht procesi në tërësi. Evropa nuk ishte gati për një gjë të tillë dhe kushtet për nisjen e negociatave të pranimet me dy vendet kandidate nuk ishin përmbushur”, tha Presidenti Macron.
Macron deklaroi pas samitit të NATO-s në Londër se është kundër zgjerimit të Bashkimit Evropian, nëse nuk ndodh një reformim i thellë i BE-së. Sipas tij, është i nevojshëm një partneritet strategjik me këto vende dhe më shumë investime.
