Lëkundjet e tërmetit sot në mëngjes, zjarrëfikësit parandalojnë një tjetër tragjedi në Kombinat

Lëkundjet e tërmetit që u shënuan mëngjesin e sotëm në Tiranë, edhe pse më e madhja ishte me magnitudë 4.5 ballë, rikthyen dhe njëherë panikun e pasojave që solli tërmeti i fortë i mëngjesit të 26 nëntorit, ku mbetën  të vdekur 51 persona dhe u dëmtuan me qindra pallate dhe banesa.

Mësohet se po sot në mëngjes zjarrëfikëset kanë ndërhyrë në zonën e Kombinatit për të shembur disa nga parapetet e pallateve që rrezikonin të shembeshin.

Këto pallate ndodhen ngjitur me pallatin ku humbi jetën 20-vjecarja, Xhesika Biqiku që ishte dhe viktima e vetme në Tiranë në tërmetin e 26 nëntorit.

Kujtojmë se ajo ishte studente e degës së Arkitekturës dhe humbi jetën në spitalin e Traumës pas një agonie të gjatë pasi u godit nga tullat që u shkëputën nga parapeti i pallatit ku banonte në Kombinat.

Ndërsa sot në mëngjes zjarrëfikësit kanë punuar për 30 minuta për të larguar pjesët e rrezikshme.

Në vazhdim ekspertët do të vendosin për ndërhyrjen e mëtejshme në këtë godinë.

Dyshohet se një nga shkaqet e dëmtimit të parapeteve është dhe pesha që kanë sjellë depozitat e ujit.