Situata që kanë shkaktuar reshjet e shumta ditët e fundit ka bërë që të thirret Shtabi i Emergjencave në Vlorë, ndërsa pritet të diskutohet mbi pasojat e shaktuara deri më tani dhe mënyrën se si do të bëhet menaxhimi në vijim.
Mësohet se niveli I Lumit Vjosë është në ngritje çka detyron daljen e tij nga shtrati e cila do të shoqërohej me dëme të shumta pasi rrezikohen banesa, ferma dhe bagëti.
Ndërkohë rapotohet se prurjet kanë kaluar nivelin 6 dhe e shkuara ka treguar se arritja e tij në nivelin 7 paraqet rrezik konkret për përmbytje.
Nga ana tjetër në zonën e Llogarasë ka pasur reshje dëbore dhe rruga është bërë e rrezikshme për t’u kaluar pasi ka ngrica në gjithë segmentin Dukat-Llogara-Palasë.
Sa i përket qarkullimit të automjeteve në zonë, këshillohet të bëhet kujdes, të lëvizet me zinxhirë dhe me goma dimri. Ajo çfarë është shqetësuese ka të bëjë me faktin se është parashikuar që edhe në orët në vijim të ketë mot të paqëndrueshëm.
