Pas miratimit të paketës anti-shpifje me 90 voto pro në kuvend, kreu i opozitës Lulzim Basha ka reaguar duke u shprehur se Rama po tenton që t’i mbyllë gojën gazetarëve shqiptarë.
Ai shton se kryeministri po përgatit vjedhjen e radhës, kësaj here mbi rrënojat e tërmetit të 26 nëntorit. Po ashtu lideri i PD-së i ka bërë thirrje Presidentit të Republikës Ilir Meta qe të mos e dekretojë këtë ligj, duke e cilësuar si atentat kundër fjalës së lirë që rikthen ligjin famëkeq të diktaturës për agjitacion e popagandë.
REAGIMI I BASHËS
Ne kulmin e një krize të rëndë ekonomike, të një gjendje të jashtëzakonshme, kur mijëra familje janë në të ftohtë, pa strehë, pa ujë, pa drita, pa ngrohje, Edi Rama me urgjencë miratoi ligjin e censurës.
Sot kur të gjithë e kemi parë dhe dëgjuar se si Edi Rama bleu zgjedhjet me krimin, se si krimi i lidhur me pushtetin po vjedh çdo pasuri te këtij vendi, Rama me urgjencë tenton ti mbyllë gojën gazetarëve.
Partia Demokratike do të vazhdojë të denoncojë me zë dhe me figurë çdo skandal, çdo fakt abuziv, çdo dështim të radhës të këtij kryeministri në ikje! Ju bëj thirrje të gjithë gazetarëve dhe analistëve, të gjithë opinionistëve dhe personave publikë të mos intimidohen dhe të vazhdojnë bashkë me opozitën të denoncojnë çdo aferë dhe skandal të kësaj qeverie në ikje! Asgjë dhe askush nuk do na e mbyllë dot gojën!
