Në mbledhjen e sotme të Komisionit Hetimor Parlamentar të ngritur për shkarkimin e presidentit Ilir Meta u miratua kërkesa për një ekspertizë më të specializuar ndaj Komisionit të Venecias.
Kjo kërkese u bë në lidhje me veprimet e presidentit për të mos organizuar betimin e Arta Vorpsit si anëtare e re e Gjykatës Kushtetuese.
Kjo situatë ka sjellë dhe reagimin e zëdhënësit të presidentit Tedi Blushi, i cili shkruan se veprimet e Komisionit Parlamentar marrin në mbrojtje në mënyrë të qartë kreun e KED Ardian Dvorani nga përgjegjësitë penale dhe kjo gjë sipas tij tregon një presion të qartë politik ndaj organit të akuzës.
POSTIMI I TEDI BLUSHIT
Veprimet e fundit të komisionit parlamentar janë qartazi marrje në mbrojtje nga përgjegjësitë penale të z.Dvorani, i cili është kallëzuar në Prokurori për veprimtarinë e tij të mirëdokumentuar kriminale.
Ky “solidaritet” vërteton se krimet e z.Dvorani janë kryer në bashkëpunim.
Dihet botërisht respekti që ka për Komisionin e Venecias ky grup i strukturuar dhe i specializuar për dhunimin e Kushtetutës.
Ndaj veprimet e tyre fundit në shkelje të ligjit dhe Kushtetutës nuk janë asgjë tjetër veçse një presion i qartë politik ndaj organit të akuzës.
Sa i përket shtyrjes së afatit të komisionit parlamentar, ne e kemi dhënë mendimin tonë: Punimet të shtyhen deri në 24 korrik 2022. Në këtë mënyrë deputetët e komisionit do kenë mundësi të përfitojnë akoma më shumë shpërblime financiare për çdo mbledhje.
