Pas tërmetit shkatërrimtar që goditi Shqipërinë më 26 nëntor, u dëmtuan disa ndërtesa shkollash.
Në mbledhjen e qeverisë, ministrja e Arsimit Besa Shahini u shpreh se tashmë janë arritur të identifikohen të gjitha shkollat që kanë pësuar dëme, konkretisht në qarkun Tiranë, Durrës dhe Lezhë.
Ajo tregoi ndër të tjera dhe dy mundësi që po diskutohen për rinisjen e procesit mësimor, por asnjëra prej tyre nuk parashikon ditën e hënë.
“Ka nevojë për pak kohë për riparimin e shkollave, është identifikuar numri i atyre institucioneve që kanë pësuar dëme.
Në 26 nëntor drejtorët e shkollave apo dhe të drejtorive Arsimore kanë identifikuar numrin e shkollave që kanë paraqitur ndonjë shqetësim.
Më 27 nëntor inspektorët kanë bërë inspektime dhe më 28-29 inxhinierë nga Kosova kanë inspektuar shkolla në Tiranë, Durrës dhe Lezhë. Më 30 nëntor kemi bërë analizën mbi situatën në fjalë. Nuk mendoj se në Durrës është koha që të fillojmë të hënën. Edhe Tirana dhe Lezha kanë nevojë për disa rregullime”, u shpreh Shahini gjatë fjalës së saj në mbledhjen e qeverisë.
