Komisioni Hetimor nuk heq dorë nga shkarkimi i Metës, shtyhet me 4 muaj afati i hetimeve

Edhe pse vendi po kalon kohët e fundit një emergjencë pas tërmetit  të fuqishëm të 26 nëntorit, ditën e sotme është mbledhur Komisioni Hetimor për shkarkimin e Presidentit Ilir Meta, që u ngrit pas dekretit të anulimit të zgjedhjeve të 30 qershorit.

Kryetari i Komisionit Ulsi Manja mungonte, dhe për këtë arsye mbledhja u drejtua nga nënkryetari dhe deputeti Alban Zeneli, i cili kërkoi të shtynte hetimet me 4 muaj pasi për shkak të gjendjes së jashtëzakonshme, Komisioni Hetimor nuk ka patur mundësi të mbledhë dhe të shqyrtojë faktet e vëna në dispozicion.

“Ky komision nuk ka pasur kohë kohën e duhur për tu mbledhur dhe për të shqyrtuar faktet. Kjo ka ardhur edhe për shkak të gjendje në Shqipëri pas tërmetit të rënë. Është e pamundur që afati që është përcaktuar me 8 dhjetor. Është koha e pamjaftueshme për të dalë në një kërkesë sa më ta saktë dhe të drejt ligjor. Shtyrja me 4 muaj kërkohet për ta nxjerrë këtë punë të saktë”, u shpreh Zeneli gjatë mbledhjes.