Ditën e sotme Komisioni i Pavarur i Kualifikimit (KPK), ka konfirmuar në detyrë prokuroren e Krimeve të Rënda, Doloreza Musabelliu.
Prokurorja është dhe kandidate për Strukturën e Posaçme Antikorrupsion, e njohur ndryshe dhe si SPAK.
Seanca dëgjimore ndaj Prokurores së Krimeve të Rënda u mbajt të hënën.
Ajo u përball me procesin e rivlerësimit për të tri kriteret, atë pasurisë, pastërtisë së figurës dhe profesionalizmin.
Gjatë seancës dëgjimore të së hënës ndaj Musabelliut, u evidentuan nga KPK disa mospërputhje në deklarimet vjetore të pasurive dhe mungesë burimesh financiare lidhur me krijimin e pasurive të bashkëjetuesit të prokurores.
Gjithashtu u relatua për një raport të dytë të Drejtorisë së Sigurimit të Informacionit të Klasifikuar, DSIK në të cilin aludohej për korrupsion pasiv dhe dekonspirim, por KPK konstatoi se çështja ishte ende nën hetim dhe se nuk mund të konkludohet nëse ka pasur dekonspirim
Gjetjet e Komisionit dhe të DSIK-së u kundërshtuan nga prokurorja Doloereza Musabelliu. Ajo e cilësoi raportin e DSIK si dashakeqës dhe në kundërshtim me ligjin.
Trupa gjykuese e Komisionit të Pavarur të Kualifikimit përbëhej nga Alma Faskaj kryesuese, Firdes Shuli relatore dhe Pamela Qirko anëtare. Në cilësinë e vëzhgueses ndërkombëtare ishte e pranishme Mia Roessingh.
Më herët Musabelliu ka mbajtur detyrën e drejtueses së njësisë së Anti-Korrupsionit te Krimet e Rënda.
Më pas në mars të 2017, ish-kreu i Krimeve të Rënda Besim Hajdarmataj e shkarkoi duke e lënë vetëm prokurore të thjeshtë në njësinë kundër trafiqeve.
Musabelliu ka kryer Shkollën e Magjistraturës në vitet 2002-2005 dhe është emëruar më pas prokurore në Prokurorinë e Krimeve të Rënda. Ajo e ushtron funksionin në këtë prokurori prej 14 vitesh.
