“Ju s’dini të flisni” Rama bën për ujë të ftohtë deputetët e rinj: Jeni gërmadha, pasojat e tërmetit të opozitës jashtë

Kryeministri Edi Rama gjatë fjalës së tij në Kuvend, seancën e sotme i është drejtuar me tone të ashpra deputetëve të rinj ose ata që quhen ndryshe si opozita e re.

Rama u shpreh se shumica e tyre nuk dintë të flasin dhe shtoi se janë pasojat e tërmetit të opozitës pasi sipas tij nëse opozita bie ata janë gërmadhat.

Ndër të tjera ai iu bëri thirrje që të mos bëhen si opozita jashtë që thotë vetëm “vjedhje, vjedhje”.

“Po pati mundësi këto muhabetet e rrugës i lini jashtë këtij vendi. Mos hajdeni këtu edhe të na bëni si më të zotë se ata. Se nuk jeni më të zotë se ata. Shumica prej jush nuk dinë të flasin. Shumica prej jush kanë problem me vendosjen e kallëzuesit në vendin e duhur. Ju jeni pasojat e tërmetit të opozitës. Ra opozita, gërmadhat jeni ju. Mbajeni me nderë këtë karrige në Parlament, shtrëngojeni dhe mbajeni me nderë, mos u bëni më keq se ata që ikën, se ata flisnin më mirë se ju. Mos hajdeni këtu të thoni vodhi, s’vodhi.

Ne do dëshmojnë me vepra, që ata që kanë nevojë për mbështetje të marrin mbështetje, dhe ata që duan strehë të marrin strehë. Ata nuk do të rrinë në hotel, derisa t’iu bëhet shtëpia, por nga janari do të kalojnë në apartamente, që do t’i marrim ne me qira për ta. Solidariteti shqiptar është afatshkurtër, e dini ju, se po ta kishim afatgjatë, do të ishim si Izraeli. Ne i lutemi Zotit, kur na duhet për të kaluar lumin, po kur jemi matanë lumit i themi Zotit ‘kush je ti, se s’na duhesh’”, u shpreh kryeministri Edi Rama.