Gjyqtarja e Krimeve të Rënda Liljana Baku, ka dhënë dorëheqjen nga detyra.
Mësohet se me datë 2 dhjetor ajo ka depozituar zyrtarisht kërkesën në Këshillin e Lartë Gjyqësor (KLGJ) ku shpjegohen dhe arsyet e largimit nga detyra.
Në letrën e dorëheqjes Baku sqaron se do të angazhohet në të ardhmen në një biznes privat dhe për këtë nuk ka mundësi të vijojë më karrierën në sistemin gjyqësor.
Por kush është Liljana Baku dhe cilat janë ‘dosjet e nxehta’ që ajo hetoi?
Liljana baku është gjyqtarja që firmosi vendimin për masën “arrest shtëpie” ndaj ish-ministrit të Brendshëm Saimir Tahiri i cili akuzohej për trafik droge.
Gjithashtu ajo ka dhënë vendimin për burg 126 vite për grupin terrorist të Imamëve në Shqipëri.
Asokohe ky vendim nuk u prit aspak mirë nga këta të fundit, ku madje iu drejtuan gjyqtares Baku me fjalët “Shumë shpejt do ta merrni dënimin”.
Gjithashtu ajo ka vendosur edhe që të mos lejonte nipin e ish-diktatorit komunist Enver Hoxha, Ermal Hoxhën që mos e kalonte Vitin e Ri në shtëpi gjatë kohës që ndodhej në burg me akuzën e laboratorit të kokainës në Xibrakë.
Ndër të tjera, në Tetor të vitit 2018, gjyqtarja Liljana Baku vendosi të aplikonte masa sigurimi për personat që denoncuan përfshirjen në trafik narkotikësh të Agron (Geron) Xhafaj, vëllait të ministrit të Brendshëm të asaj kohe, Fatmir Xhafaj.
Në vijim të vendimeve, kujtojmë se Liljana Baku vendosi të lintë në burg dhe trafikuesit e armëve të kapur në Qafë-Botë të Sarandës.
Trafikantët Akil Buratzi, Sokol Lepuri, Sefer Lleshi dhe Altin Kaca u lanë në qeli pas vendimit të gjyqtares së dorëhequr tashmë , Liljana Baku.
Mësohet se gjyqtarja Baku ishte edhe pjëse e trupës gjyqësore që dënoi grupin e Emiljano Shullazit.
