Listës së shteteve që kanë dhuruar para për Shqipërinë i është bashkuar dhe Gjermania.
Mësohet se shteti gjerman do të japë 4 milionë euro për rindërtimin e Shqipërisë pas tërmetit tragjik që goditi vendin tonë mëngjesin e 26 nëntorit.
Lajmi është bërë i ditur nga ambasada gjermane në Shqipëri, e cila deklaron se qeveria gjermane do të ndihmojë shtetin shqiptar me anë të granteve ku do të rindërtohen shkolla dhe ndërtesa publike në përputhje me standartet më të fundit të sigurisë dhe eficencës së energjisë.
Peter Zingraf, i cili mban detyrën e ambasadorit gjerman në vendin tonë , është i gatshëm të ndihmojë Shqipërinë derisa procesi i rindërtimit të riktheje normalitetin e jetës së përditshme.
‘Gjermania mbështet rindërtimin me 4 milion euro. Sot ne informuam zyrtarisht qeverinë shqiptare: Qeveria Federale do të mbështesë rindërtimin pas tërmetit të tmerrshëm të 26 nëntorit me grante në shumën e 4 milion euro përmes Bankës Gjermane për Zhvillim (KfW). Me të do të rindërtohen shkolla dhe ndërtesa publike në përputhje me standardet më të fundit të sigurisë dhe efiçensës së energjisë.
Në lidhje me këtë mbështetje, Ambasadori Gjerman në Shqipëri, Z. Peter Zingraf u shpreh: “Gjermania do të ndihmojë Shqiperinë për të rindërtuar shkollat dhe institucionet publike. Ky grant është një nga elementët e mbështetjes Gjermane pas tërmetit të 26 nëntorit i cili traumatizoi shumë shqiptarë dhe shqiptare. Rindërtimi do të shërbejë për rikthimin dalëngadalë në normalitin e jetës së përditshme’, thuhet në njoftimin e ambasadës gjermane.
