LIGJET E BIZNESIT
Qeveria do të marrë borxh në tregjet ndërkombëtare për të mbuluar faturën e dëmeve të tërmetit. Ministrja e Financave, Anila Denaj deklaron se do të sigurohet eurobondi me vlerë 500 milionë euro, ndërsa paralelisht po punohet me Bankën Botërore dhe FMN për garantimin e dy kredive të buta.
Kryefinancierja nuk ka dhënë një shifër të saktë për vlerën e faturës, por në A2 Business Week ajo deklaron se pritet të jetë mbi 500 milionë euro.
“I gjithë fondi prej 20 miliardësh ka një komponent të nevojshëm rritje, e cila do të financohet me një borxh të shtuar, por jo me një borxh të rritur ndaj Prodhimit të Brendshëm Bruto. Nënkuptojmë Eurobondin. Kjo vlerë prej 500 milionë eurosh mund të shoqërohet dhe me një vlerë të rritur të huamarrjes, e cila sot është ofruar nga disa institucione të rëndësishme financiare si FMN dhe BB”, tha Denaj.
Ministrja e Financave ka zbardhur edhe paketën e masave që do të merren për bizneset në zonat e prekura, veçanërisht në Durrës.
“Në zonën e Durrësit ku janë dëmtuar dhe bizneset, në një diskutim që kemi bërë me unionet e dhomave kemi biseduar dhe për një paketë masash ndihmëse që do të konsiderohen nga Ministria e Financave dhe Ekonomisë për një periudhë disa mujore për të mos shtrënguar situatën e tyre”, shtoi Denaj.
Kryefinancierja ka argumentuar edhe ndikimin që situata post tërmet do të ketë tek ekonomia. Qeveria i qëndron parashikimit për rritje ekonomike 4.1% vitin e ardhshëm, të bazuar te konsumi dhe tek investimet. (Marrë nga A2 CNN)
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
