Betimi i 8 prokurorëve të SPAK, vjen reagimi i fortë i Ambasadës së SHBA: Mori fund pandëshkueshmëria, drejtësi për popullin shqiptar

Pas betimit të 8 prokurorëve të SPAK sot në presidencë përpara Ilir Metës, ka ardhur dhe reagimi i ambasadës së SHBA në Tiranë.

Me anë të nje mesazhi në faqen zyrtare, Ambasada e SHBA thekson se ky process shënon një hap të rëndësishëm nër themelimin e Strukturës së Posaçme Anti-Korrupsion dhe Krim i Organizuar.

Ndër të tjera Ambasada e SHBA shton se SPAK do ti japë fund pandëshkueshmërisë dhe do të sjellë drejtësi për shqiptarët.

“Shtetet e Bashkuara përgëzojnë tetë prokurorët të cilët u betuan këtë mëngjes si anëtarët e parë të Zyrës së Prokurorisë së Posaçme, duke shënuar një hap të rëndësishëm në themelimin e Strukturës së Posaçme Anti-Korrupsion dhe Krim i Organizuar (SPAK).

Nga dita e sotme, Shqipëria ka një organ prokurorësh të angazhuar për të identifikuar, hetuar dhe vënë përpara drejtësisë zyrtarë të kaluar apo aktualë dhe bosë të krimit – individë që në kohët e vjetra janë konsideruar si të paprekshëm.

Ndërsa Shqipëria nis një fazë të re të zhvillimit të saj demokratik dhe ligjor, Shtetet e Bashkuara do të mbeten një partner i palëkundur në mbështetje të SPAK dhe të të gjithë atyre që kërkojnë ti japin fund pandëshkueshmërisë dhe të sjellin drejtësi për popullin shqiptar.”-thuhet në njoftimin e ambasadës së SHBA.