Ditën e sotme është ekstraduar nga Greqia 55-vjeçari Kudret Shametaj, i dënuar me 18 vjet burg për vrasjen e vëllait të ish-kryetarit të Partisë Socialiste në Sarandë.
Kudret Shametaj ka vrarë në Manastir të Sarandës, në vitin 1997, Andon Mërkurin, vëllain e ish-kryetarin e PS Sarandë, Gjergji Mërkuri.
Konflikti asokohe nisi për një gomë makine, ku pas kësaj Shametaj nxorri kallashnikovin dhe qëlloi Mërkurin për vdekje.
55-vjeçari, Kundret Shametaj ishte një nga më të kërkuarit e Policisë Sarandës dhe pas arrestimit në Greqi, ai do të vuajë dënimin në Shqipëri.
NJOFTIMI ZYRTAR I POLICISE
Interpol Tirana
Vijon bashkëpunimi mes Interpol Tirana dhe homologëve për kapjen dhe ekstradimin e shtetasve të shpallur në kërkim ndërkombëtar.
Ekstradohet nga Greqia një shtetas shqiptar i dënuar me 18 vjet burg për vrasje dhe armëmbajtje pa leje.
Nga specialistët e Interpol Tiarana u krye ekstradimi nga Greqia drejt vendit tonë i shtetasit shqiptar Kudret Shametaj, 55 vjeç.
Ky shtetas ishte i shpallur në kërkim ndërkombëtar nga Interpol Tirana, pasi Gjykata e Rrethit Gjyqësor Tiranë e ka denuar me 18 vjet burg për veprat penale “Vrasja” dhe “Armëmbajtja pa leje”. Ky shtetas ka vrarë me armë zjarri shtetasin A. M.
Si rezultat i bashkëpunimit të Interpol Tirana me Interpol Athina, u bë i mundur arrestimi dhe ekstradimi i tij nga Greqia drejt vendit tonë.
