LIGJET E BIZNESIT
Një nga biznesmenët më të fuqishëm të Maltës, Yurgen Fenech, është vënë në pranga nga policia vendase pas hetimit mbi vrasjen e gazetares investigative Daphne Caruana Galizia.
Sipas agjencisë së lajmeve Reuters, policia e ka arrestuar miliarderin në jahtin e tij në detin Mesdhe, pak pasi e kishte ankoruar në port.
Yurgen Fenech është president i kompanisë Tumas Group, aksioner në një sërë kompanish të fuqishme gazi, hotelesh, në shumë investime të botës.
Rënia e tij në pranga u realizua një ditë pasi qeveria e Maltës deklaroi se do i ofronte falje një ndërmjetësi të dyshuar në vrasjen me bombë të gazetares në vitin 2017, nëse ai do tregonte se kush qëndronte pas këtij atentati që tronditi mbarë opinionin publik botëror.
Shkak për këtë krim është bërë arsyeja se gazetarja e kishte përmendur emrin e biznesmenit në investigimet që kishin të bënin me korrupsionin në vend, të cilat i publikonte në blogun e saj, ku implikoheshin zyrtarë të lartë maltezë në skandalin “Panama Papers..
Fenech kryeson një grup biznesi që fitoi një koncesion të madh të energjisë nga qeveria Maltese në 2013 për të ndërtuar një stacion të energjisë me gaz.
Kujtojmë se gazetarja Daphne Caruana Galizia u vra me bombë që u vendos në makinën e saj afër kryeqytetit Valeta në tetor të vitit 2017.
