Ditën e sotme policia e Elbasanit ka dhënë detaje për dy të miturit të moshës 15 vjeç që u gjetën të shtrirë në rrugë mbrëmë pasi kishin konsumuar pije alkoolike në ambjentet e një lokali.
Uniformat blu bëjnë me dije se të dy adoleshentët ishin dehur në një festë ditëlindjeje dhe janë marrë masa dhe ndaj lokalit që ka lejuar përdorimin e alkoolit në mosha të tilla.
Madje sipas informacioneve ata kanë konsumuar dhe hashash, fakt ky që e ka rënduar akoma dhe më tepër gjendjen e tyre shëndetësore.
NJOFTIMI ZYRTAR I POLICISE
Mbrëmjen e djeshme, në Spitalin e Elbasanit, kanë shkuar për ndihmë mjekësore, dy të mitur të moshës 15 vjeç , banues në Elbasan.
Dy 15 vjeçarët ishin në gjendje të dehur pasi në ambientet e një lokali në Qytetin e Elbasanit, gjatë një feste ditëlindjeje kishin konsumuar pije alkoolike.
Në zbatim të ligjit ” Për mbrojtjen e të miturve nga përdorimi i pijeve alkoolike dhe energjike”, Inspektorati i Shtetëror Shëndetësor Elbasan, në bashkëpunim me Komisariatin e Policisë Elbasan i ka vendosur masë administrative këtij subjekti tregtar.
Materialet hetimore i kaluan Prokurorisë pranë Gjykatës së Shkallës Parë Elbasan, për vlerësim.
