Tentuan të vrasin 27-vjeçarin pasi u gërvishti makinën, arrestohen dy të rinjtë në Lezhë (EMRAT-VIDEO)

Policia ka vënë në pranga ditën e sotme dy të rinj, pasi ishin shpallur në kërkim për tentativë vrasje ndaj 27-vjeçarit Saimir Nikolla.

Mësohet se ata janë Kristian Ndoci dhe Kristian Petuku (Sherri) dhe kërkoheshin nga policia që nga shtatori i këtij viti.

Tentativa për vrasje erdhi pas një konflikti banal mes dy të rinjve dhe Saimir Nikollës në lagjen SMT te “Ura e Cenit” në Lezhë.

Për shkak të gërvishtjes së një automjeti, sherri degjeneroi në përdorimin e armës dhe më pas në tentativë vrasje.

Si pasojë e konfliktit me armë i riu u plagos rëndë dhe u dërgua me urgjencë në spitalin e Traumës, por më pas ishte jashtë rrezikut për jetën.

Pas dy muajsh policia ka arritur të vërë dy autorët Kristian Ndoci dhe Kristian Petuku (Sherri) në pranga.

Ndoci dhe Petuku janë dënuar me burg nga Gjykata e Rrethit Gjyqësor Lezhë për veprat penale “Vrasja me paramendim, e kryer në bashkëpunim, mbetur në tentative” dhe “Armëmbajtja pa leje”.

NJOFTIMI ZYRTAR I POLICISE

Finalizohet operacioni policor “Dajçi”

Operacioni për kapjen e personave të shpallur në kërkim.

Kapen dhe ndalohen dy të rinj, të kërkuar për veprat penale “Vrasja me paramendim, e kryer në bashkëpunim, mbetur në tentativë” dhe “Armëmbajtja pa leje”.

Operacioni nga specialistët për Hetimin e Krimit në Komisariatin e Policisë Lezhë, në bashkëpunim me Forcën e Posaçme “Shqiponjat”.

Në zbatimin të planit të masave për kapjen e personave në kërkim dhe pas një pune të mirëorganizuar nga Komisariati i Policisë Lezhë është finalizuar operacioni policor i koduar “Dajçi”, në kuadër të të cilit, u bë e mundur kapja e dy personave të shpallur në kërkim:

K.N., 25 vjeç, lindur dhe banues në Lezhë, i dënuar më parë, person në kërkim për veprat penale “Vrasja me paramendim, e kryer në bashkëpunim, mbetur në tentativë” dhe “Armëmbajtja pa leje”.

K.P. (Sh.), 25 vjeç, lindur dhe banues në fshatin Ishull, Lezhë, i dënuar më parë, person në kërkim për veprën penale “Vrasja me paramendim, e kryer në bashkëpunim, mbetur në tentativë”.

Këta dy shtetas ishin shpallur në kërkim, pasi më datë 28.09.2019 në bashkëpunim me njëri-tjetrin në lagjen SMT, Lezhë, tek “Ura e Cenit”,  pas një konflikti për motive të dobëta kanë plagosur rëndë me armë zjarri shtetasin S. N.

Në lidhje me këtë ngjarje, Gjykata e Rrethit Gjyqësor Lezhë ka caktuar masën e sigurisë “Arrest në burg” për këta shtetas, për veprat penale “Vrasja me paramendim, e kryer në bashkëpunim, mbetur në tentative” dhe “Armëmbajtja pa leje “.