Kryeministri Edi Rama ka mbledhur sërish mëngjesin e sotëm Këshillin e Ministrave.
Pas situatës së tërmetit që goditi vendin, mëngjesin e 26 Nëntorit, Rama i ka bërë thirrje opozitës që ndodhet jashtë parlamentit që të ndihmojë nxjerrjen e Shqipërisë nga kjo gjendje e jashtëzakonshme.
Ai u shpreh se nuk kanë gjë tjetër çfarë të ndajnë përveç nevojës së përbashkët për të bërë më të mirë vendin apo komunitetin dhe se duhet të jenë bashkë dhe të punojnë bashkë.
“Do të ishim shumë vlerësues nëse opozita do të përfshihej me një ose dy përfaqësues në Komitetin e ndërtimit, nuk kemi çfarë ndajmë përveç nevojës së përbashkët për të bërë më të mirë për vendin dhe komunitetin.
Nuk është komisioni i djajëve dhe ëngjëjve, apo i Reformës Zgjedhore, ky është komisioni i ditëve me diell. Është mirë që të jemi bashkë dhe të punojmë bashkë. Fakti që tërmeti ka shkaktuar dëme dhe banorët janë në çadra do të trajtoheshin njësoj, por e mira do të ishte të përfshiheshin në perimetrin e emergjencës.
Duke marrë dhe opinion me Bashës dje, them që na përputhen shqetësimet dhe idetë. Kjo është e papërfshirë nga zavazi politik që së shpejti do të fillojë, se janë dhënë shenjat e para”, deklaroi kryeministri gjatë mbledhjes.
