Si ndodhi atentati ndaj prokurorit Ndoja, policia jep detaje, kush janë të plagosurit e tjerë (EMRAT)

Pas atentatit që iu bë prokurorit të Durrësit Arjan Ndoja në mbikalimin e Shkozetit, ka dalë dhe njoftimi zyrtar i policisë ku sqarohet se si ndodhi ngjarja.

Sipas policisë persona të paidentifikuar kanë qëlluar me armë zjarri në drejtim të mjetit me targa AA 333 ZD dhe për pasojë janë plagosur Aleksandër Laho (48 vjeç), Arjan Ndoja (44 vjeç) dhe Andi Maloku (30 vjeç).

Ky i fundit është nisur për mjekim të specializuar në Spitalin e Traumës në Tiranë, ndërsa dy të plagosurit e tjerë ndodhen në Spitalin Rajonal Durrës, jashtë rrezikut për jetën.

NJOFTIMI ZYRTAR I POLICISE

Ne aksin rrugor Durrës – Tiranë në afërsi të mbikalimit të Shkozetit, rreth orës 16:30, në afërsi të vendit të quajtur “Mbikalimi i Shkozetit” kanë qëlluar me armë zjarri në drejtim të mjetit me targa AA 333 ZD, e për pasojë janë plagosur shtetasit A.L., 48 vjeç, A.N., 44 vjeç dhe A.M., 30 vjeç.

Shtetasi A.M. është nisur për mjekim të specializuar në Spitalin e Traumës në Tiranë, ndërsa dy shtetasit e tjerë ndodhen në Spitalin Rajonal Durrës, jashtë rrezikut për jetën.

Policia e Durrësit është vënë në ndjekje të autorëve, po krihet zona dhe në të gjitha akset rrugore që lidhen me Durrësin janë ngritur pika kontrolli.

Për zbardhjen e ngjarjes  është ngritur menjëherë një grup i posaçëm hetimor nga Departamenti i Policisë Kriminale, Prokuroria e Rrethit Gjyqësor Durrës dhe Drejtoria Vendore e Policisë Durrës.

Policia e Shtetit fton këdo që mund të ofrojë informacion në ndihmë të hetimit të shpejtë të ngjarjes të telefonojë falas në numrin 112.