LIGJET E BIZNESIT
6 shqiptarë kanë rënë në prangat e policisë spanjolle gjatë operacionit “Saksi”.
Shqiptarët e arrestuar midis 25 dhe 45 vjeç, kishin mbjellë kanabis në një ndërtesë të madhe industriale, e vendosur midis qytetit të Catral dhe rrethit Oriolana të Mudamiento.
Hetuesit spanjollë e patën shumë të vështirë gjetjen e fabrikës ku kultivohej droga.
Zona ku ndodhej ndërtesa ishte e mpipopulluar dhe vendi ku banda kultivonte lëndët narkotike ishte i fshehur.
Ndërtesa ishte e ruajtur me masa të rrepta sigurie, madje ajo vëzhgohej 24 orë prej shqiptarëve, shprehen mediat spanjolle.
Pas verifikimit të ndërtesës nga ana e agjentëve, hyrja brenda saj ndodhi në 22 tetor, ndërsa detajet e operacionit u dhanë sot nga policia spanjolle.
Brenda, u zbulua ferma prej rreth 3 mijë metrash katrorë, e ndarë në 7 dhoma të pajisura me pajisjet elektronike të nevojshme për kultivimin e marijuanës, ndërsa kishin edhe një dhomë gjumi dhe një kuzhinë.
Nga mbjelljet e gjetura (2719 bimë), është përllogaritur se do të prodhohej qindra kg marijuanë.
Në ndërtesë, janë gjetur 74 kg marijuanë, 808 llamba nxehtësie, 31 pajisje ajrimi, 19 filtra ajri, një gjenerator i madh elektrik, etj.
Përveç kësaj, lidhja e ndërtesës industriale me rrjetin e energjisë elektrike ishte kryer në mënyrë të paligjshme, duke shpenzuar afërsisht çerek milioni euro, e përllogaritur nga momenti kur nisën hetimet.
Sa i përket kontrolleve të bëra në shtëpinë e drejtuesit të grupit kriminal, janë gjetur dy makina profesionale të paketimit me vakum, dhjetëra çanta të përgatitura për paketimin e drogës, dy peshore si dhe 1300 euro.
Përveç gjashtë të arrestuarve, në pranga ka përfunduar edhe një elektricist spanjoll, 45 vjeçar, pasi dyshohet se ka kryer të gjithë instalimin elektrik të ndërtesës industriale.
Shtatë të paraburgosurit tashmë janë vënë në dispozicion të Autoritetit Gjyqësor, i cili ka vendosur lënien në paraburgim të përkohshëm për të gjithë, në pritje të gjykimit.
