LIGJET E BIZNESIT
Pas tërmetit të fuqishëm 6.4 ballë që goditi vendin tonë mëngjesin e 26 nëntorit, ku u shkaktuan 50 viktima dhe rreth 800 të plagosur, ka nisur edhe sensibilizimi i njerëzve për mbledhjen e fondeve të domosdoshme për ndihma dhe për të ndërtuar banesat e personave që tashmë kanë mbetur të pastrehë.
Edhe biznesmenët më të njohur në vend tashmë janë vënë në lëvizje dhe kanë filluar të japin kontributin e tyre.
Në listën e donatorëve për tërmetin janë dhe aksionerët e kompanisë “EHW” Luan Leka dhe Melika Leka, që janë bashkuar thirrjes solidare për të ndihmuar banorët e prekur nga pasojat e tërmetit.
Ata kanë dhuruar 200 mijë euro në fondin e e-albania.
Gjithashtu edhe kompania më e madhë naftënxjerrëse në vend “Bankers Petroleum” ka dhuruar 1 milionë dollarë për banorët e prekur nga tërmeti.
ME anë të një deklarate Bankers thekson se këto ditë kanë qenë të vështira dhe traumatike për Shqipërinë dhe shqiptarët.
Duke shprehur hidhërimin dhe ngushëllimin për viktimat dhe dëmet e shkaktuara nga tërmetet, Bankers njofton se do të ndihmojë në rindërtimin e banesave të shkatërruara.
Në listë është dhe një nga biznesmenët më të fuqishëm shqiptarë, Samir Mane, i cili ka vendosur të dhurojë 1.2 milionë euro për banorët e dëmtuar nga pasojat e tërmetit.
Gjithashtu, Presidenti i Grupit Balfin, Mane, së bashku me Bordin Drejtues dhe kompanitë përkatëse, kanë vendosur që përveç kësaj shume, t’iu vijnë në ndihmë të prekurve nga tërmeti edhe me mjetet e nevojshme e baza ushqimore.
“Bordi Drejtues i Grupit Balfin nën kujdesin e veçantë të Presidentit Samir Mane dhe kompanitë përkatëse te Grupit vendosen sot që të akordojnë shumën prej 1.2 milionë eurosh për të dëmtuarit nga tërmeti në Shqipëri”, shkruhet në njoftim.
