Redjan Rraja ndyshon papritur dëshminë: Nuk janë syzet e mia, të plagosurit nuk i njoh

Ditën e sotme është zhvilluar gjyqi ndaj Redjan Rrajës të dyshuarit kryesor për atentatin ndaj prokurorit Arjan Ndoja. Vetëm pak momente më parë është zbardhur dëshmia e tij. 34-vjeçari që u zbulua nga gjurmët e gishtërinjve të cilat ndodheshin në syzet që u gjetën në automjetin e atentatorëve është shprehur se ato syze nuk i ka përdorur kurrë.

Ai ka mohuar që ky send që e çoi në pranga të jetë i tij, ndërkohë që në deklaratat e mëparshme jozyrtare, është mësuar se Rraja ka deklaruar se syzet ishin të tijat, por lidhje me atentin nuk kishte.

Ndër të tjera në dëshminë zyrtare theksohet se Rraja, i njohur si ‘Dara’ e Krujs është shprehur se nuk i njeh personat që mbetën të plagosur në atentat, prokurorin Arjan ndoja, Landi Muharremin e njohur si “Rrumi” dhe shoferin Andi Maloku.

I arrestuari me profesion stomatolog ka deklaruar se s’i ka takuar kurrë këta persona dhe se nuk ka hipur asnjëherë në makinën me të cilën u krye atentati. Ai gjithashtu bën me dije se më datë 1 nëntor kur u krye edhe atentati ka qenë në Tiranë dhe në Nikël, ku ka edhe shtëpinë.

Pjese nga dëshmia

“Nuk e di si u gjetën gjurmët e mia në makinën e autorëve. S’kam hipur në anjë moment në atë makinë. nuk e njoh pronarin e makinës që u vodh në Tiranë. Në 1 nëntor 2019 kam qenë në Tiranë dhe Nikël, ku kam shtëpinë. Nuk kam asnjë njohje me personat e plagosur, nuk i kam takuar kurrë. Syzet e sekuestruara në makinë nuk janë përdorur nga unë,”- është shprehur ndër të tjera Redjan Rraja.