Policia e Tiranës në sajë të operacionit të koduar “Befasia” ka arrestuar gjatë orëve të vona të natës një person të shpallur në kërkim.
Mësohet se ai është 29-vjeçari Taulant Manaj dhe është kapur nga uniformat blu gjatë kohës që po fshihej në një pallat në lagjen “Ali Demi”.
Manaj është dënuar nga Gjykata e Rrethit të Vlorës në 18 shtator të vitit të kaluar pasi ka tentuar të vrasë një person tjetër.
Kush është Taulant Manaj ?
Taulant Manaj (Beqiri) ose ndryshe ‘i rrezikshmi i Vlorës’ ishte vënë nën prangat e policisë për një ngjarje të ndodhur më datë 27 shkurt të këtij viti, ku pas një konflikti mes dy grupeve në Vlorë, kishte mbetur i plagosur.
Pas ngjarjes, për të u vendos masa e sigurisë arrest me burg por edhe pse ndodhi kjo masë ai u kap teksa lëvizte me automjet dhe armë brenda tij.
Në gusht të vitit 2018, Manaj (Beqiri) u lirua nga gjykata e faktit dhe gjyqtarja Herla Çela, e cila konfirmoi se ishte njohur vetëm me rastin e fundit, ndërsa në dosje nuk kishte asnjë informacion se Taulant Manaj ishte person i përfshirë edhe në ngjarjen e datës 27 shkurtit.
Çështja shkaktoi shumë tensione, saqë për lirimin e Beqirajt nga paraburgimi Ministria e Brendshme kërkoi edhe shkarkimin e gjyqtares. Rastin e denoncoi edhe Ministria e Drejtësisë dhe KLD, ndërsa gjyqtarja ngulte këmbë tek mungesa provave.
Pas lirimit, ishte Gjykata e Apelit të Vlorës ajo që vendosi ta rikthejë në burg të riun nga Vlora, por kur policët shkuan në banesën e tij për të bërë shoqërimin, Manaj ishte arratisur.
NJOFTIMI ZYRTAR I POLICISE PER ARRESTIMIN E SOTEM TE TAULANT MANAJ
Tiranë
Finalizohet operacioni policor “Befasia”, për kapjen e një personi me rrezikshmëri shoqërore.
Operacioni nga Komisariati i Policisë Nr.1.
Kapet dhe ndalohet një shtetas i shpallur në kërkim për “Vrasje me paramendim e mbetur në tentativë” dhe “Armëmbajtje pa leje”.
Specialistët për Hetimin e Krimit në Komisariatin e Polcisië Nr.1 në bazë të informacioneve të marra në rrugë operative se një person në kërkim nga Vlora fshihej në një pallat në lagjen “Ali Demi” dhe falë një pune të mirëorganizuar në bashkëpunim me Patrullat e Përgjithshme të këtij Komisariati, zhvilluan dhe finalizuan operacionin policor të koduar “Befasia”.
Si rezultat i operacionit në orët e vona të mbrëmjes së djeshme u bë e mundur kapja e personit në kërkim:
– T. M., 29 vjeç, lindur në Vlorë dhe banues në Vlorë.
Ky shtetas ishte shpallur në kërkim, pasi Prokuroria pranë Gjykatës së Apelit Vlorë më datë 18.09.2018 ka dërguar urdhërin për ekzekutimin e vendimit penal të Gjylkatës së Apelit Vlorë, e cila ka vendosur masën e sigurisë nga “Arrest në shtëpi” në atë me “Arrest me burg” për veprat penale “Vrasje me paramendim e mbetur në tentativë” dhe “Mbajtja pa leje e armëve luftarake dhe municioneve”.
U njoftur Drejtoria Vendore e Policisë Vlorë për ndjekjen e mëtejshme të procedurave.
