Pasi Komisioni Qendror i Zgjedhjeve vendosi ta shkarkojë, Agim Kajmaku u largua nga detyra.
Por një ditë përpara largimit, ai vendos ‘të hakmerret’ ndaj të deleguarës së PS-së në zonë, ministres Belinda Balluku.
Sipas “ABC News”, në tre muajt e vetëm si kryebashkiak i Vorës, Kajmaku ka punuar me dy nënkryetarë, Laureta Omerin dhe Hekuran Brahimajn.
Por një ditë përpara se KQZ të vendoste për ta shkarkuar për shkak se u cilësua si subjekt i dekriminalizimit, ai shkarkoi dy nënkryetarët, ndërkohë që në bashki përflitej se e përzgjedhura e Ballukut, Laureta Omeri do të merrte detyrën e përkohshme si Kryetare e Bashkisë.
Kështu, në vend të dy nënkryetarëve Kajmaku emëroi shefin e tij të kabinetit Gent Picari i cili dhe tani që Kajmaku nuk është në detyrë ka marrë funksionet e kryebashkiakut.
Dy nënkryetarët janë përpjekur të shpallin të paligjshëm dy urdhërat e shkarkimeve por asnjë nga institucionet nuk i ka rrëzuar ato.
