Ngërçi për Kushtetuesen, Kuvendi sot në seancë të jashtëzakonshme

Ditën e sotme Kuvendi do të mbajë sot një seancë të jashtëzakonshme në orën 10.00, ku do të miratohet rezoluta, e cila i kërkon Presidentit të reflektojë dhe të respektojë vetëm ato kompetenca që i njeh Kushtetuta.

Mësohet se të gjithë deputetët janë lajmëruar që të jenë të pranishëmm pas ngjarjeve të fundit, ku Marsida Xhaferllari u dekretua nga presidenti Meta si anëtare e Gjykatës Kushtetuese dhe mosnjohjes së Arta Vorpsit si kandidatja e parë e propozuar nga Këshilli i Emërimeve në Drejtësi  (KED).

Propozuesit e rezolutës shprehen se Presidenti Ilir Meta me veprimet e kryera prej tij së fundmi, ka tentuar të bllokojë funksionimin normal të Gjykatës Kushtetuese.

Sipas projektrezolutës Presidenti ka marrë abuzivisht kompetencat e KED, pasi ky i fundit është organi i vetëm që përcakton renditjen.

Më tej thuhet se dekreti i Metës për Marsida Xhaferllarin është i pavlefshëm.

Kuvendi ndër të tjera i bën thirrje Gjykatës Kushtetuese dhe organeve të tjera që në kuadër të Reformës në Drejtësi të zbatojnë me përgjegjshmëri detyrat pa krijuar kështu pengesa për fillimin e punës së gjykatëseve të Kushtetueses: Arta Vorpsi, Elsa Toska dhe Fiona Papajorgji.