Një ditë pas takimit me krerët e partive opozitare që dogjën mandatet e deputetëve dhe më pas me ish-presidentin Rexhep Mejdani, mësohet se Ilir Meta do të nisë ditën e sotme me një tjetër takim të rëndësishëm.
Bëhet me dije se Meta do të takojë sot edhe Sali Berishën, në kuadër të postit që ky i fundit ka mbajtur si ish-president, pas konsultimeve që ka nisur ditët e fundit në lidhje me situatën politike.
Takimi do të mbahet në Presidëncë në orën 12.00.
Në fokus të bisedimeve do të jetë kriza e thellë politike që po kalon vendi edhe pas kaosit të krijuar për Gjykatën Kushtetuese.
Kujtojmë se disa ditë më parë presidenti Meta deklaroi se mund të shpërndajë parlamentin me një dekret.
“Parlamenti një ditë do të shpërndahet, nuk është ky problemi, puna është se ky Parlament kot sa rri edhe një ditë më shumë në këtë mënyrë si sillet. Ju e dini shumë mirë se Parlamenti shpërndahet gjithmonë me dekret të Presidentit”, u shpreh Meta.
