Meta 30 minuta në telefon me Palmer, presidenca paralajmëron: Jemi gati të zbardhim bisedën nëse…

Ditën e djeshme presidenti Ilir Meta ka kryer një telefonatë me zv. ndihmësin Sekretarit të Shtetit në SHBA Matthew Palmer.

Kjo bisedë erdhi me kërkesë të zyrtarit të lartë amerikan dhe mësohet se ka zgjatur rreth 30 minuta.

Ky fakt është konfirmuar ditën e sotme dhe nga zëdhënësi i presidentit Tedi Blushi.

Ai shkruan se biseda ka qenë tepër e qartë dhe pyet ambasadën e SHBA nëse lejojnë të publikohet kjo bisedë, edhe nëse po ata janë gati ta vënë në dispozicion të opinionit publik vendas dhe ndërkombëtar, duke bërë kështu dhe një paralajmërim të fortë.

REAGIMI I PLOTE I TEDI BLUSHIT

Të dashur kolegë gazetarë, Interesimit tuaj për një lajm, që siç më vutë në dijeni, ja u ka konfirmuar z.Guri Lekloti dhe ju ka sugjeruar t’ja u konfirmoj edhe unë, ju sqaroj:

Po, është e vërtetë që mbrëmjen e djeshme ka patur një bisedë telefonike rreth 30 minuta mes Presidentit të Republikës, Sh.T.Z Ilir Meta dhe Zv.Ndihmës Sekretarit të Shtetit të SHBA, z.Matthew Palmer, me kërkesë të këtij të fundit. Qëndrimet e Presidentit Meta të shprehura gjatë kësaj bisede telefonike kanë qenë mjaft të qarta, transparente dhe shteruese.

Megjithatë nëse z.Lekloti, bie dakord me ambasadën e SHBA në Tiranë, dhe na autorizon ta publikojmë të plotë transkriptin e kësaj bisede telefonike, ne jemi gati ta vëmë atë të plotë në dispozicion të opinionit publik vendas dhe ndërkombëtar. Presidenti Meta nuk ka asgjë për të fshehur! Konfirmojmë se marrëdhëniet tona strategjike me SHBA janë të forta, të qëndrueshme dhe transparente, si asnjëherë!