“Fredooom House” ka publikuar raportin e përvitshëm për lirinë e medias, ku Shqipëria ka zbritur me 7 vende në Indeksin Botëror të Lirisë së Medias.
Pas këtij raporti ka reaguar dhe presidenti Ilir Meta. Përmes një mesazhi Meta thekson se liria e medias në vendin tonë fatkeqësisht është përkeqësuar ndjeshëm.
Po ashtu kreu i shtetit flet për censurë dhe autocensurë, ndërsa shton se presionet politike të tejskajshme dhe të shumëllojshme kanë mbyllur emisione televizive dhe kanë larguar nga ekranet figura të spikatura të gazetarisë.
“Liria e medias në vendin tonë fatkeqësisht është përkeqësuar ndjeshëm.Mjedisi dhe kushtet e punës së gazetarëve gjithashtu. Censura dhe autocensura ndihen qartësisht në raportimet e tyre të përditshme. Presionet politike të tejskajshme dhe të shumëllojshme kanë mbyllur emisione televizive dhe kanë larguar nga ekranet figura të spikatura të gazetarisë. Ndërsa panelet e emisioneve politike të mbrëmjes më shumë orientohen nga interesat e oligarkëve dhe PPP-ve, se sa nga interesi publik dhe kombëtar.
Shumë portale në të zezë e kanë ngritur “Fake Neës” në sistem, duke u vënë në shërbim të shtetit të propagandës. Ndërsa praktikat e “kasetave të gatshme” dhe të transmetimeve me “regji qendrore” po u imponohen gjithmonë e më shpesh televizioneve. Një nisëm ligjore “anti-shpifje” e propozuar nga qeveria tronditi thellë komunitetin e gazetarëve dhe organizatat botërore që monitorojnë lirinë e medias në vendin tonë”, shprehet Meta
