Marsida Qatja ndaj së cilës është ngritur një akuzë konkrete nga Prokuroria ka udhëtuar në Gjermani, bashkë me djalin e saj dy vjeç e gjysmë.
Me ikjen e saj hetimet e dosjes për vrasje dhe trafik droge kanë mbetur pezull, ndërsa vetë ajo akuzohet edhe për vënien e ambienteve për përdorim të lëndëve narkotike dhe për të është dhënë masa e sigurisë detyrim paraqitje.
Në ngjarjen e Kavajës mbeti i vrarë Dritan Haxholli, krim për të cilin akuzohet ish-oficeri i sigurisë në Burgun e Durrësit Bledar Toçi. Ndaj këtij të fundit është ngritura akuzë edhe për trafik droge, ndërsa dyshohet se viktima Haxholli, vetë Marsida si dhe Bledar Toçi e vëllai i tij Bernardi ishin pjesë e një rrjeti droge që vepronte në Kavajë dhe jo vetëm.
Por, pas largimit të Marsidës në Gjermani, atje ku ndodhet në burg edhe bashkëshorti i saj, hetimet kanë ngecur. Sepse, dëshmia e Marsidës do të hidhte më shumë dritë mbi rrjetin e drogës së pari, por edhe rrethanat e krimit të vrasjes në shtëpinë e saj, pavarësisht atyqë janë pohuar deri tani.
Ajo është larguar drejt Gjermanisë atje ku ndodhet edhe bashkëshorti i saj që vuan dënimin, në datën 8 nëntor.
