LIGJET E BIZNESIT
Gjatë fjalës së sotme në seancën e jashtëzakonshme parlamentare, kryeministri Edi Rama theksoi se beteja e qeverisë nuk është me Ilir Metën, por me prokurorët dhe gjyqtarët që ai i ka cilësuar si grupin “KÇK” ose ndryshe “ kap ca të kapësh”.
Rama u shpreh se më 25 nëntor do të prezantojë në publik platformën e luftës kundër krimit dhe këtyre pjesëtarëve të drejtësisë.
Sipas tij një luftë e tillë nuk është parë ndonjëherë në Shqipëri, e cila do të jetë frontale dhe do të godasë pasurinë e tyre.
Kjo platformë, shtoi kryeministri, do të sillet në Kuvend dhe aty do të shpërndahet sipas votës, se kush është vërtetë pro kësaj beteje.
“Beteja jonë sot nuk është me Ilir Metën, beteja është më KÇK-në. Duhet vepruar një orë e më parë kundër KÇK, duke nxjerrë në pah të gjithë përmasën e llumit që është kthyer në një shtupë që e pengon sot më shumë se asnjëherë rrjedhjen e lirë të ujërave drejt sistemit të drejtësisë.
Ky është një tjetër motiv për ne, të shpejtojmë dhe përshkallëzimin e luftës ndaj KÇK-së mos e lëmë thjesht dhe vetëm në radhën e pritjes së vettingut por ta nisim dhe ta shoqërojmë njëkohësisht me një përshkallëzim të luftës kundër krimit të organizuar.
Ata që kanë marrë dënim për krime të rënda të lidhura me veprimtari kriminale më shumë se sa një vrasje, ata që janë akuzuar për krim të organizuar dhe për krime të rënda të asaj natyre dhe që nuk janë dënuar si rezultat i atyre prokurorëve e gjykatëseve që e kthyen drejtësinë në një pazar, duhet të kthehen një orë e më parë në shënjestrën tonë.
Nuk mundet më që ata nga njëra anë, dhe këta të tjerët nga ana tjetër, KÇK t’i gëzojnë pasuritë e tyre. Ofensiva ndaj pasurive të tyre do të jetë thelbi i një procesi pa kthim që do duhet dhe do të nisë një orë e më parë.
Kam qenë këtu kur fola për rastin skandaloz të Durrësit dhe u zotova se do t’i sjell kuvendit shumë shpejt një platformë ligjore për tu miratuar dhe për tu kthyer në platformë lufte ndaj krimit dhe KÇK-së. më 25 nëntor unë do t’i prezantoj publikut shqiptar këtë platformë. Do të jetë sfida e vërtetë e këtij kuvendi, që do ndajë ata që janë gati për ta shpallur këtë luftë ose jo. Do të jetë një luftë që nuk është parë ndonjëherë në Shqipëri, dhe kemi nevojë për mbështetje të gjithanshme”, u shpreh Rama.
