Kryetarja e Lëvizjes Socialiste për Integrim, Monika Kryemadhi ka bërë sot një deklaratë ku është shprehur se Arta Vorpsin e ka shpallur anëtare të Gjykatës Kushtetuese gruaja e Maks Haxhisë, avokatit të Saimir Tahirit.
Teksa ndodhet për një vizitë në Shtetet e Bashkuara të Amerikës, Kryemadhi ka dhënë një intervistë për “Zërin e Amerikës”, ku ka komentuar dhe kaosin e ngritur ditët e fundit për Gjykatën Kushtetuese.
Kryemadhi ka thënë se me çfarë të drejte boton Dvorani vendimet e KED në Fletoren Zyrtare, duke ngritur kështu dyshime për lidhjet e tij me drejtoreshën e qendrës së botimeve, e cila është njëkohësisht dhe bashkëshortja e avokatit, Maks Haxhia.
“Dua të përgëzoj që filloi lëvizja për të krijuar institucionin më të rëndësishëm në Shqipëri. Mosfunksionimi i Gjykatës Kushtetuese ka sjellë këtë rezultat që kemi sot, zgjedhje moniste, opozitën jashtë parlamentit, një sistem drejtësie që kërkohet të kapet nga qeveria dhe një stanjacion dhe depopullim të Shqipërisë.
Me çfarë të drejte z.Dvorani boton vendimet e KED në Fletore Zyrtare. Kush ia ka bërë këtë gjë? Cila është lidhja me drejtoreshën e qendrës së botimeve, bashkëshortja e Maks Haxhisë? A ka një lidhje me avokatin e ish-ministrit Tahiri?
Zonjën Vorpsi e ka shpallur gruaja e Maks Haxhisë, i cili është avokat i Saimir Tahirit. Gjykata Kushtetuese u ngrit, ka shumë çështje për të diskutuar”, u shpreh Kryemadhi.
