LIGJET E BIZNESIT
Ditën e sotme Presidenti Ilir Meta ka kallëzuar zyrtarisht në prokurori kreun e KED Ardian Dvoranin. Menjëherë pas kësaj ka reaguar edhe partia demokratike.
Në një deklaratë për shtyp, Gazmend Bardhi deklaroi se Dvorani ka minuar ligjshmërinë dhe besueshmërinë e Gjykatës Kushtetuese.
Bardhi shton më tej se duhet një hetim i shpejtë, i plotë dhe i pavarur ndaj Dvoranit, në mënyrë që sipas tij të rikthehet besimi tek drejtësia.
Deklaratë e Sekretarit të Përgjithshëm të PD, Gazment Bardhi
Kallëzimi penal i Presidentit të Republikës ndaj Kryetarit të KED është akti i duhur në mbrojtje të Kushtetutës dhe integritetit të Gjykatës Kushtetuese.
Me veprimet e tij në shërbim të partisë në pushtet, Ardian Dvorani ka minuar ligjshmërinë dhe besueshmërinë e Gjykatës Kushtetuese.
Partia Demokratike beson se një hetim i shpejtë, i plotë dhe i pavarur i shkeljeve të ligjit nga Ardian Dvorani, është një gur themeli për rikthimin e besimit tek drejtësia.
Nga veprimet e prokurorisë do të varet, nëse shqiptarët mund të besojnë akoma se Reforma në Drejtësi nuk u bë që sistemi të kontrollohet nga Edi Rama, por për t’i dhënë fund pandëshkueshmërisë së politikanëve dhe zyrtarëve të korruptuar dhe për të trajtuar shqiptarët si të barabartë para ligjit.
