LIGJET E BIZNESIT
Presidenti Ilir Meta zgjodhi mbrëmë që të mos ishte në përurimin e stadiumit të ri “Air Albania Stadium” në Tiranë dhe njëkohësisht as në ndeshjen Francë- Shqipëri.
Kreu i Shtetit preferoi më shumë ta ndiqte ndeshjen live nga divani i shtëpisë së bashku me maçokun e tij Sasha.
Por ai nuk ka mbetur pa reaguar duke dhënë opinionin e tij për ndeshjen dhe duke zbuluar arsyen se përse nuk ishte i pranishëm në stadium.
Meta zbulon se mungoi në këtë ndeshje për shkak të ndërrimit të emrit të stadiumit nga “Qemal Stafa” në “Air Albania”.
Nga ana tjetër presidenti e ka lënë të hapur mundësinë që një ditë të shkojë në stadium, pasi sipas tij “ne të gjithë do themi si gjithmonë: “Do shkojmë në Qemal Stafa!””.
POSTIMI I PLOTE I PRESIDENTIT ILIR META
Të dashur tifoza Kuq e Zi!
Sot keni shkëlqyer me entuziazmin tuaj të pandalshëm, duke treguar se tifozët më të mirë janë ata që brohorasin ekipin edhe më shumë kur është në disavantazh. Sot nuk isha dot midis jush sepse jam i palumtur për heqjen e padrejtë të emrit të stadiumit tonë kombëtar për arsye komerciale!
Por kjo nuk do të thotë se nuk do vij në të ardhmen. Pasi ne të gjithë do themi si gjithmonë: “Do shkojmë në Qemal Stafa!”
Shpresojmë të mos dëgjojmë ndonjë iniciativë të marrë për t’i ndërruar emrin dhe vendit për arsye komerciale. Nderim për të gjithë ata që luajtën me nder me fanellën kuqezi në “Qemal Stafa” për mëse shtatë dekada!
