I kishin ekzekutuar të atin 6 vite më parë, zbulohen autorët e sulmit në Rubik, 26-vjeçari i dënuar në Greqi

Mbëmjen e djeshme qyteti i Rubikut u trondit nga një sulm me armë ku mbeti i plagosur një 26-vjeçar. Policia njofton se ka identifikuar autorët e ngjarjes.

Sipas policisë autorët kanë qenë katër, dhe mes tyre ka pasur lidhje familjare.Ngjarja dyshohet se ka ndodhur për probleme të vjetra mes të riut dhe autorëve.

Babai i Lekës është vrarë me armë zjarri 6 vite më parë, një ngjarje që ende rezulton të jetë e pazbardhur. Nga ana tjetër vetë 26-vjeçari ka qenë i denuar me 4 vite burg në Greqi për trafik droge, ngjarje kjo që dyshohet se lidhen dhe me plagosjen e djeshme.

Leka u transportua dje nga Rubiku në Spitalin e Traumës, ku ndodhet në gjendje të rëndë.

Njoftimi i policisë:

Identifikohen dhe shpallen në kërkim autorët e dyshuar të plagosjes së shtetasit F. L., ndodhur mbrëmjen e djeshme.

Në lidhje me ngjarjen e ndodhur mbrëmjen e djeshme në vendin e quajtur “Kroji Shtogut” Mirditë, ku mbeti i plagosur me armë zjarri një shtetas, Policia ngriti një grup të posaçëm hetimor nën drejtimin e Prokurorisë së Rrethit Gjyqësor Lezhë, për zbardhjen e kësaj ngjarjeje.

Nga tërësia e veprimeve hetimore rezultoi se gjatë një konflikti për motive të dobëta,në bashkëpunim me njëri-tjetrin, shtetasit A.N.,A.N., V.P. dhe A.P.,banues në Lezhë dhe Mirditë, kanë goditur me sende të forta dhe plagosur me armë zjarri shtetasin F. L.

Policia e Qarkut Lezhë vijon kontrollet intensive për gjetjen dhe kapjen e autorëve të dyshuar, të cilët janë shpallur në kërkim.

Materialet iu referuan Prokurorisë pranë Gjykatës së Shkallës së Parë Lezhë, për veprime të mëtejshme hetimore.