FMN mbërrin në Tiranë, merr në sitë ekonominë

Mbërrin në Tiranë misioni i FMN-së për të analizuar ecurinë e deritanishme të ekonomisë. Gjatë dy javëve të qëndrimit në Tiranë, zyrtarët e lartë të Fondit Monetar do të zhvillojnë takime me drejtues të qeverisë shqiptare dhe institucioneve vendase, si Banka e Shqipërisë. Takime do të zhvillohen edhe në nivel teknik me përfaqësues të Ministrisë së Financave.

Takimin e parë, shefi i misionit të FMN-së, Jan Kees Martijn e zhvilloi me guvernatorin Gent Sejko. Çështjet e diskutuara gjatë këtij takimi ishin  zhvillimet makroekonomike gjatë vitit 2019 dhe pritjet për rritjen ekonomike, inflacionin, kursin e këmbimit, zhvillimet në sektorin bankar, kreditimin, kreditë me probleme për periudhën në vijim.

Pas qëndrimit dy javor në Tiranë, misioni i FMN-së pritet të dalë në një konferencë për shtyp, ku do të japë përfundimet për ecurinë e ekonomisë dhe çështje të ndjeshme, si kontratat PPP, detyrimet e prapambetura, borxhin e qeverisë dhe buxhetin 2020, që ka nisur diskutimet në Kuvend.