Ditët e fundit ka qarkulluar një lajm, kryesisht në mediat online se kryeministri Edi Rama kishte anuluar takimin me presidentin e Maqedonisë së Veriut Stevo Pendarovski dhe gjithashtu mungoi në seancën në Kuvend apo në takimin në Elbasan, për shkak se ishte jo mirë nga ana shëndetësore dhe kishte probleme.
Menjëherë ai ka reaguar për këtë fakt në konferencën e sotme në Ohër.
Ai iu përgjigj interesit të gazetarëve në lidhje me gjendjen e tij shëndetësore duke thënë se nuk ka probleme me shëndetin.
Ndër të tjera numri një i qeverisë tha se i vinte keq që shëndeti i tij ishte bërë temë diskutimi e atyre që kanë humbur pushtetin.
“Më vjen keq që shëndeti im është shpresa e atyre që humbin pushtetin. Skam probleme shëndetësore. Edhe sikur të kisha, besoj se nuk është kjo një rrugë fortë e respektueshme për të bërë politikë”, tha Rama.
Mes të tjerash ai ka sqaruar edhe faktin se pse ka munguar në daljet e tij publike. “Lidhur me ligjin special shumë shpejt ne do ta bëjmë publik dhe më lejoni të mos nxjerr ende detaje. Kjo është edhe një arsyet e mungesës sime të zakonshme në publik. Kemi punuar me një grup të gjerë pune, me partnerë ndërkombëtarë dhe kemi grupuar shumë eksperienca botërore dhe kam vendosmërinë të hyjmë në një luftë të pa njohur më parë kundër krimit të organizuar dhe të marrim masa kundër prokurorëve dhe gjyqtarëve të grupit KÇK”, -u shpreh kryeministri gjatë fjalës së tij.
