LIGJET E BIZNESIT
Ditën e djeshme policia arrestoi Redjan Rrajën, pasi dyshohet se është përfshirë në atentatin mafioz në mbikalimin e Shkozetit ditën e premte, ku mbeti i plagosur prokurori Arjan Ndoja, shoferi i tij Andi Maloku dhe ‘i forti’ i Shijakut Landi Muharremi.
Ndërkohë ende vijojnë të dalin detaje mbi Redjan Rrajën, nipin e deputetit të Partisë Socialiste Rrahman Rraja.
Për Redianin ka folur edhe gazetari Poli Hoxha duke zbuluar se deri në 2005 ai ka qenë një djalë i urtë dhe pas këtij viti është transformuar totalisht.
Hoxha, i ftuar në emisionin Opinion, shton ndër të tjera se Redjan Rraja deri në 2005 ka punuar për një rrogë të thjeshtë 200-250 mijë lekë të vjetra për një laborant turk në Fushë-Krujë.
Por pasi Rrahman Rraja u bë deputet, gjithcka ndryshoi dhe se Rediani u transformua, duke u kthyer në të paprekshëm dhe se tani disponon biznese me shifra të mëdha në Tiranë.
“Fakt është që çunat e asaj zone atje marrin përsipër ngjarje në gjithë Shqipërinë. Atje është kthyer në një offshore dhe janë gati të paprekshëm nga asgjë, edhe nga kontrollet. Unë sot kam biseduar me një mikun e Redjanit. Redjani ka qenë një djalë që deri në vitin 2005 kur i flisje ulte kokën.
Ka vazhduar në një universitet privat për stomatologji. Është martuar shpejt. Dhe nusen e ka stomatologe. Ka punuar deri në vitin 2005 si ndihmës për 200-250 mijë lekë të vjetra për një laborant turk në Fushë-Krujë.
Redi i thërrasin shkurt. Nga Redi kaloi në “Dara”. Në 2005-ën çfarë ndodhi? Në fisin Rraja ndodhi një transformim. Kur u bë deputet Rrahaman Rraja ata u transformuan dhe siç e thotë Emiljano Nuhu ata janë ligji aty, ata në fakt nga 2005-a kanë qenë ligji. Ky djalë i mirë që 21 vjeç dhe atë periudhë e kishte ndarë mendjen të shkonte në Kanada papritur u transformua. Ai ka ambiente biznesi në Tiranë me shifra shumë të mëdha. Nikla është ndërlidhëse me Durrësin për drogën e Veriut për portin e Durrësit dhe andej”, u shpreh Poli Hoxha.
