“Çmendet” 36-vjeçari, pas sherrit thyen xhamat e komshiut dhe sulmon me sopatë policët

Ditën e sotme një ngjarje e rëndë ka ndodhur në fshatin Taç Lart në Kolonjë.

Banorët janë tmerruar nga agresiviteti i një 36-vjeçari dhe kanë telefonuar policinë për të kërkuar ndihmë.

Mësohet se 36-vjeçari me iniciale B.A Kishte bërë sherr me komshiun e tij 66 vjeç dhe më pas kishte thyer me gurë xhamat e shtëpisë.

Pas telefonatës dhe ndihmës që kërkuan banorët, uniformat blu kanë mbërritur në vendngjarje për të parandaluar përshkallëzimin e konfliktit, mirëpo 36-vjeçari ka bërë rezistencë duke i kanosur me një sopatë.

Në këto rrethana, Policia e ka çarmatosur B.A, që doli se kishte qënë edhe më parë i dënuar për dhunë në familjen e vet dhe e ka arrestuar.

Nga kontrolli në shtëpi ku ndodhej edhe babai i tij, F.A, 64 vjeç, policia gjeti 22 kg kanabis si dhe 69 copë fishekë, krahas sëpatës.

36-vjeçari i arrestuar tanimë akuzohet për 4 vepra penale: “Prodhimi dhe shitja e narkotikëve, kryer në bashkëpunim”, “Mbajtja pa leje dhe prodhimi i armëve dhe i municionit”, “Kanosja për shkak të detyrës”, “Shkatërrimi i pronës”.

Po ashtu, filloi procedimi penal në gjendje të lirë ndaj babait të tij F.A, për veprën “Prodhimi dhe shitja e narkotikëve, kryer në bashkëpunim”.