Pas takimit që zgjati 90 minuta në Presidencë mes liderëve të opozitës jashtë parlamentare dhe kreut të shtetit Ilir Meta, ka folur edhe kryetari i Partisë Demokratike Lulzim Basha.
Duke iu përgjigjur interesimit të gazetarëve në lidhje me këtë takim, Basha ka treguar detajë në lidhje me atë që është diskutuar së bashku me aleatët.
Ndër të tjera kryedemokrati është shprehur se qëllimi i vetëm i Ramës është kapja e institucioneve të drejtësisë dhe Gjykatës Kushtetuese dhe ka shtuar se në takim ai së bashku me aleatët u njohën me provat tronditëse të ndërhyrjes së kryeministrit në Reformën Zgjedhore dhe emërimin e anëtarëve të Gjykatës Kushtetuese.
“Në takimin me Metën u njohëm me provat tronditëse të ndërhyrjes së Ramës në Reformën Zgjedhore dhe në emërimin e anëtarëve të Gjykatës Kushtetuese. Qëllimi i vetëm i këtij kryeministri është kapja e institucioneve të drejtësisë dhe Gjyktës Kushtetuese. Aleatët dhe PD e kanë quajtur këtë një grusht kushtetues dhe një provë më shumë që me këtë qeveri reforma në drejtësi është e kapur”, u shpreh Basha në prononcimin e tij përpara gazetarëve.
