Në dhjetorin e vitit të kaluar Këshilli i Ministrave miratoi bonusin ose ndihmën e menjëhershme financiare për nënat me foshnje të sapolindura.
Ndërsa sot në mëngjes, kryeministri Edi Rama ka zgjedhur të ndajë me krenari shifrat me anë të një video dhe ka treguar se janë 30,067 bebe kanë përfituar bonusin që nga 1 janari kur VKM-ja hyri në fuqi, deri në fund të muajit tetor.
“MIRËMËNGJES
dhe me lajmin e bukur të 30,067 bebeve që kanë përfituar bonusin deri në fund të tetorit 2019, ju uroj një ditë të mbarë’”, shkruan kryeministri në Facebook.
Sipas vendimit të Këshillit të Ministrave (VKM) , shpërblimi për është në masën 40.000 lekë për lindjen e fëmijës së parë; 80.000 lekë për lindjen e fëmijës së dytë dhe 120.000 lekë për lindjen e fëmijës së tretë dhe fëmijëve të tjerë në vijim.
Ndërkohë, për nënat që lindin binjakë, masa e përfitimit është 80.000 lekë për secilin fëmijë. Kurse, për nënat që lindin trinjakë dhe më shumë, masa e përfitimit numëron 120.000 lekë për secilin fëmijë.
Ndihmën e menjëhershme financiare e përfitojnë edhe nënat shtetase shqiptare për fëmijë të lindur jashtë vendit dhe të regjistruar sipas afateve ligjore të përcaktuara në ligjin për gjendjen civile.
