Në kohën që parlamenti po mban seancën e jashtëzakonshme për të votuar rezolutën kundër dekretit të presidentit për anëtaren e Kushtetueses Marsida Xhaferllari, Ilir Meta ka bërë një paralajmërim të fortë se me një dekret mund të shpërndajë parlamentin.
Deklaratën presidenti e ka dhënë përpara gazetarëve në kohën që po dilte nga një aktivitet për barazinë gjinore në një nga hotelet kryesore të Tiranës.
“Situata është tërësisht e zgjidhur për ata që dinë të lexojnë Kushtetutën… dhe meqënëse po vjen data 22 nëntor kur populli shqiptar votoi me referendum kushtetutën dhe këto parime ende edhe pse janë bërë deformime në pabesi, kam një paralajmërim të fundit: Betimi i Ilir Metës me dorën në Kushtettutë nuk ka qenë një proces formal apo ceremonial. Nuk ka institucion më të rëndëshëm se sa Kushtetuta e vendit, e cila ka vetëm një garant që është Gjykata Kushtetuese. Përpjekjet për të dhunuar Kushtetutën për të kapur gjithë sistemin e drejtësisë me kapjen e Gjykatës Kushtetuese po u them askush të mos guxojë të dhunojë Gjykatën Kushtetuese. Parlameti me një dekret shpërndahet, Qeveria me një mocion rrëzohet. Nëse dikush mendon se angazhimet e mia kanë qenë ceremoniale ju bëj të ditur se Presidenti do ti tregojë vendin kësaj bande dhe skllevërve të tyre”, u shpreh presidenti gjatë fjalës së tij.
