Agim Kajmaku në kërkim/ Prokuroria ultimatum noterëve: Njoftoni nëse paraqitet ose do mbani përgjegjësi!

Ish-kryetari i Bashkisë së Vorës Agim Kajmaku ndodhet ende në arrati pas shpalljes në kërkim nga policia dhe nuk dihet asgjë për vendndodhjen e tij.

E gjendur në këto kushte, Prokuroria e Tiranës i ka dërguar një shkresë Dhomës Kombëtare të Noterisë, ku i kërkohet të raportojë për çdo  lëvizje që do të bëjë ish-kryebashkiaku, pasi për prokurë ai duhet të paraqitet te noterët.

Kështu, ky organ urdhëron të gjithë noterët që duhet të njoftojnë në rast se Agim Kajmaku paraqitet pranë tyre ose përndryshe do të mbajnë përgjegjësi ligjore.

“Noterët të njoftojnë policinë, nëse para tyre paraqitet Agim Kajmaku. Nëse nuk njoftojnë, noteri do të mbajë përgjegjësi ligjore”, thuhet në shkresën e Prokurorisë.

Mësohet se shkresa është shpërndarë në të gjitha zyrave të noterisë në vend dhe mban firmën e drejtuesit të seksionit Kolë Hysenaj.